வாழும் தமிழ்
To read the article in English: Living Tamil.
வாழும் தமிழ்: (Living Tamil) நவீனத் தமிழ் இலக்கிய வாசகர்களின் கூட்டமைப்பால் உருவாக்கப்பட்ட உலகளாவிய இலக்கிய அமைப்பு. அடுத்த தலைமுறை வாசகர்களுக்கு தமிழ் இலக்கியத்தை அறிமுகப்படுத்துவதும், தமிழ் இலக்கியப் படைப்புகளையும் அவற்றின் ஆசிரியர்களையும் உலகிற்கு அறிமுகப்படுத்துவதும் இதன் நோக்கம். இது உலகின் மதிப்பு மிக்க விருதுகளில் ஒன்றாகிய வாழும்தமிழ் விருதை வழங்குகிறது.
உருவாக்கம்
முப்பது ஆண்டுகளாகப் புலம்பெயர் சூழலில் தமிழ் எழுத்துகளை முன்னெடுத்துச் செயல்பட்டு வந்த கனடாவைச் சேர்ந்த தமிழ் எழுத்தாளர் காலம் செல்வம் மேற்கொண்ட ஒரு முன்னெடுப்பிலிருந்து 'லிவிங் தமிழ்' என்ற பெயர் பெறப்பட்டது.
முதல் வாழும் தமிழ் இலக்கியத் திருவிழா 2026 ஏப்ரல் 3, 4 ஆகிய தேதிகளில் நியூயார்க்கில் நடத்தத் திட்டமிடப்பட்டது. இதன் மூலம் வாசகர்களின் ஓர் இலக்கியக் கூட்டமைப்பு உருவானது. இந்த முன்னெடுப்பு படிப்படியாக ஓர் இயக்கமாக வளர்ந்தது. இதில் பங்கேற்றவர்கள் இதனை உலகளாவிய, நிரந்தரமான இலக்கிய அமைப்பாக உருவாக்க முடிவெடுத்தனர். 2026 மார்ச் 25 அன்று புதுதில்லியில் நடைபெற்ற செய்தியாளர் சந்திப்பில் அமைப்பின் பிரதிநிதிகளால் இது அறிவிக்கப்பட்டது.
நியூயார்க் இலக்கியத் திருவிழாவின் வெற்றியைத் தொடர்ந்து, அடுத்த திருவிழாவை 2027 செப்டம்பர் 11, 12 ஆகிய தேதிகளில் லண்டனில் நடத்தத் திட்டமிடப்பட்டது. திருவிழாவை ஏற்பாடு செய்வதற்காகப் பல்வேறு குழுக்கள் உருவாக்கப்பட்டன. அவற்றை ஒருங்கிணைப்பதற்கான ஓர் அமைப்பும் நிறுவப்பட்டது. லிவிங் தமிழ் இலக்கிய அமைப்பு 2026 செப்டம்பர் 26 அன்று தனது அதிகாரப்பூர்வ இணையதளத்தைத் தொடங்கியதன் மூலம் முறையாக அறிவிக்கப்பட்டது.
அமைப்பு
வாழும் தமிழின் தாய் அமைப்பாக 2010ஆம் ஆண்டு தொடங்கப்பட்ட விஷ்ணுபுரம் இலக்கிய வட்டம் செயல்படுகிறது. கடந்த பல ஆண்டுகளாக அது தொடர்ந்து மேற்கொண்ட இலக்கியச் செயல்பாடுகளின் வழியாக, உலகெங்கும் பரவியுள்ள பெரும் வாசகர் சமூகத்தை ஒன்றிணைத்துள்ளது.
நவீனத் தமிழ் இலக்கியத்தை வளர்த்தெடுத்து, உலகளாவிய வாசகர்களிடம் கொண்டுசெல்லும் நோக்கத்துடன், வாழும் தமிழ் இலக்கிய அமைப்பு உலகளாவிய வாசகர்கள் மற்றும் எழுத்தாளர்களைக் கொண்ட ஒரு கட்டமைக்கப்பட்ட இலக்கியக் கூட்டமைப்பை உருவாக்கியுள்ளது.
இவ்வமைப்பில் உலகின் பல்வேறு நாடுகளைச் சேர்ந்த 30 கௌரவ உறுப்பினர்களைக் கொண்ட ஆலோசனைக் குழு உள்ளது. ஆஸ்திரேலியா, ஜப்பான், மலேசியா, சிங்கப்பூர், இந்தியா, இலங்கை, கனடா, நெதர்லாந்து, ஆஸ்திரியா, ஸ்வீடன், தென்கொரியா, ஐக்கிய அரபு அமீரகம், இங்கிலாந்து, அமெரிக்கா உள்ளிட்ட நாடுகளைச் சேர்ந்தவர்கள் இதில் இடம்பெற்றுள்ளனர்.
மேலும், உலகின் பல்வேறு நாடுகளைச் சேர்ந்த 30 இளம் உறுப்பினர்களைக் கொண்ட செயற்குழுவும், நூற்றுக்கும் மேலான உறுப்பினர்களைக் கொண்ட பொதுக்குழுவும் இவ்வமைப்பில் செயல்படுகின்றன.
செயல்பாடுகள்
லிவிங் தமிழின் செயல்திட்டத்தில் நான்கு முக்கிய நோக்கங்கள் இடம்பெற்றுள்ளன:
- ஆண்டுதோறும் வாழும் தமிழ் இலக்கியத் திருவிழாவை நடத்துவது.
- ஆண்டுதோறும் உலக இலக்கியத்திற்கான வாழும் தமிழ் உலக இலக்கிய விருது வழங்குவது.
- உலகெங்கும் இலக்கியப் பயிலரங்குகளையும் சந்திப்புகளையும் நடத்துவது.
- நவீன இலக்கியத்திற்காக அர்ப்பணிக்கப்பட்ட சவுத் பவுண்ட் ரிவ்யூ இதழை வெளியிடுவது.
நோக்கம்
வாழும் தமிழ் என்பது தமிழ் இலக்கியத்தையும், விரிந்த பொருளில் தென்னிந்திய இலக்கியங்களையும் முன்னெடுத்துச் செல்வதற்காக உருவாக்கப்பட்ட ஒரு பண்பாட்டு அமைப்பு. இதற்கு எந்தவிதமான அரசியல் சார்பும் இல்லை. எனினும், அதன் உறுப்பினர்கள் தங்களுக்கெனத் தனிப்பட்ட அரசியல் நம்பிக்கைகளைக் கொண்டிருப்பதற்குச் சுதந்திரம் உண்டு.
தமிழ் மற்றும் தென்னிந்திய இலக்கியங்கள் சுதந்திரமான வளர்ச்சிப்பாதை வழியாக உருவாக்கிக்கொண்ட தனித்துவமான இயல்புகளைக் கொண்டவை என்று இந்தக் கூட்டமைப்பு நம்புகிறது. அரசாங்கங்கள், கல்வி நிறுவனங்கள் மற்றும் பிற பண்பாட்டு அமைப்புகளின் ஆதரவின்றியே இவை பெரும்பாலும் வளர்ந்துள்ளன. தனித்துவமான அழகியல் மற்றும் தத்துவக் கொள்கைகளைக் கொண்ட சிற்றிதழ்களின் வழியாகவே இவை உருவாகி வந்தன.
இந்தத் தனித்துவமான வளர்ச்சிப் போக்கின் காரணமாக, தமிழ் மற்றும் பிற தென்னிந்திய மொழி இலக்கியங்கள், இந்தியாவின் பிரதான இலக்கியச் சூழலில் போதிய அங்கீகாரத்தைப் பெறவில்லை.இந்திய மைய ஓட்டச் சூழல் பெரும்பாலும் இந்திய ஆங்கில இலக்கியத்தை மையமாகக் கொண்டதாகவும், அரசுகள், கல்வி நிறுவனங்கள், அரசியல் மற்றும் பண்பாட்டு அமைப்புகளின் ஆதரவுடன் வளர்ந்ததாகவும் உள்ளது.
நவீனத் தமிழ் இலக்கியத்தின் தனித்துவமான பண்புகளையும் அழகியலையும் உலகெங்கும் உள்ள வாசகர்களின் கவனத்திற்குக் கொண்டுசெல்வதும், இந்திய மற்றும் உலக இலக்கியப் பரப்பில் அதற்குரிய இடத்தை நிலைநாட்டுவதுமே வாழும் தமிழ் அமைப்பின் செயல்திட்டம்.
செயல்முறை
விஷ்ணுபுரம் இலக்கிய வட்டம் கடந்த இருபது ஆண்டுகளாக வெற்றிகரமாகச் செயல்பட்டு வரும் ஒரு ஜனநாயகத் தன்மையிலான, அதிகாரப் பரவலாக்கம் கொண்ட செயல்முறையை உருவாக்கியுள்ளது. வாழும் தமிழ் அமைப்பும் அதே அணுகுமுறையையே பின்பற்றுகிறது.
நிதி நிர்வாகத்தைக் கவனிப்பதற்காக இந்த அமைப்புக்கு ஓர் அறக்கட்டளை இருந்தாலும், தலைவர், செயலாளர் அல்லது பிற நிர்வாகப் பொறுப்புகள் போன்ற முறையான பதவிகள் எதுவும் இல்லை. ஒவ்வொருவரும் தங்களால் இயன்ற பங்களிப்பைச் செய்கிறார்கள்; தங்களுக்கு ஒதுக்கப்பட்ட பணிகளுக்கான பொறுப்பையும் ஏற்றுக்கொள்கிறார்கள். ஒரு குறிப்பிட்ட செயல்பாட்டுக்குப் பொறுப்பேற்றுக்கொள்பவர், அதை ஒருங்கிணைத்து நடத்துவதற்காகப் பிறரையும் இணைத்துக்கொள்கிறார்.
எழுத்தாளர் ஜெயமோகன் இந்த இயக்கத்தின் வழிகாட்டியாக விளங்குகிறார். இதன் உறுப்பினர்களில் பெரும்பாலோர் அவரது படைப்புகளின் வாசகர்கள். எனினும், இந்த இயக்கத்தின் கிளைகளாகச் செயல்படும் பண்பாட்டு மற்றும் இலக்கிய அமைப்புகளின் மீது மையப்படுத்தப்பட்ட கட்டுப்பாடு எதுவும் இல்லை. ஒவ்வோர் அமைப்பும் தனது இலக்கிய மற்றும் பண்பாட்டு நோக்கங்களின் மீதான பொதுவான ஈடுபாட்டின் அடிப்படையில், சுதந்திரமாகச் செயல்படுகிறது.
இந்த இயக்கம் முழுவதும் அதன் சொந்தக் குழுமத்தினரின் நன்கொடைகளால் நடத்தப்படுகிறது. ஒவ்வொரு நிகழ்வும் செலவினங்களில் மிகுந்த கவனம் செலுத்தப்பட்டு, மிகவும் எளிமையான முறையில் நிகழ்கிறது. இதன் விளைவாக, தனது செயல்பாடுகளைத் தொடர்ந்து முன்னெடுப்பதற்குப் பெருந்தொகையான நிதியை இந்த இயக்கம் ஒருபோதும் சார்ந்திருந்ததில்லை.
தன்னார்வப் பங்கேற்பு, பகிர்ந்துகொள்ளப்பட்ட பொறுப்பு, கூட்டான அர்ப்பணிப்பு ஆகியவற்றின் அடிப்படையில் அமைந்துள்ள இந்த அதிகாரப் பரவலாக்கப்பட்ட கட்டமைப்பே, இந்த அமைப்பின் மிகப்பெரிய பலங்களில் ஒன்றாகும்.
கனவு
வாழும் தமிழ் இலக்கியக் குழுமம் கருத்தியலைவிட இலட்சியவாதத்தில் நம்பிக்கை கொண்டுள்ளது. இலக்கியமே ஓர் இலட்சியவாதம்; அது தன் அழகியலின் வழியாக இலட்சியவாதமாக வெளிப்படுகிறது. பின்நவீனத்துவச் சூழல் என்று அடிக்கடி வருணிக்கப்படும் இன்றைய உலகில், அரசுகள், அரசியல் கட்சிகள், கல்வி நிறுவனங்கள் போன்ற பெரும் அமைப்புகள் இலக்கியத்தின் அழகியல் மதிப்புகளின் மீது ஒருவகையான தாக்குதலைத் தொடுத்து, அதைத் தங்களுடைய நோக்கங்களுக்கான வெறும் கருவியாகச் சுருக்கிவருகின்றன. பல்வேறு ஐயத்திற்குரிய பகுப்பாய்வு முறைகளும் கோட்பாடுகளும் உருவாக்கப்பட்டு, பரவலாகப் பிரச்சாரம் செய்யப்படுகின்றன. உண்மையில், இது இலக்கியம் என்னும் நிகழ்வின் மீதே தொடுக்கப்படும் தாக்குதலாகும்.
இலக்கியம் என்பது அடிப்படையில் வாழ்க்கையைப் பற்றிய விமர்சனம் என்றும், மொழியின் வழியாக ஆழ்மனத்தின் வெளிப்பாடு என்றும், பண்பாட்டை வரையறுத்தும் மறுவரையறை செய்தும் செல்லும் ஒரு செயல்பாடு என்றும் இந்தக் குழுமம் நம்புகிறது. சில போலியான தத்துவார்த்த இலக்கிய விமர்சனங்கள் முன்வைப்பதுபோல, வாசிப்பு என்பது வெறுமனே குறியீடுகளை அவிழ்ப்பதோ அல்லது கட்டுடைப்பதோ அல்ல. மாறாக, புனைவு முன்வைக்கும் வாழ்க்கையைத் தானும் வாழ்ந்து, அதிலிருந்து உணர்வுகளையும் அறிவையும் பெற்றுக்கொள்ளும் அனுபவமே வாசிப்பு என்பது.
இலக்கியம் என்பது மொழியில் நிகழ்த்தப்படும் ஒரு கனவு. வாசகன் அந்தக் கனவின் பார்வையாளனோ ஆய்வாளனோ அல்ல; அவனும் அதில் உடன்கனவு காண்பவன். வாசிப்பின் இன்பத்திலும் அதிலிருந்து பெறக்கூடிய ஞானத்திலும் வாழும் தமிழ் இலக்கியக் குழுமம் நம்பிக்கை கொண்டுள்ளது. இலக்கியத்தின் அடிப்படை மதிப்புகளைப் பேணுவதில் உறுதிகொண்ட, இயல்பாக உருவான வாசகர் இயக்கமே வாழும் தமிழ்.
தொடுப்புகள்
✅Finalised Page
முதலில் வெளியிடப்பட்ட தேதி:
27-Sep-2026, 11:10:47 IST
